विराटनगर, मोरङ – जिल्ला प्रहरी कायालय मोरङले अनलाइन जुवा खेलाउने दुई जनालाई पक्राउ गरेको छ। पक्राउ पर्नेमा विराटनगर महानगरपालिका वडा नं. १२ का २० वर्षीय उत्सव अर्याल र १८ वर्षीय उत्कृष्ट अर्याल रहेका छन्।
प्रहरीका अनुसार उनीहरूले १xbet लगायतका एप्स प्रयोग गरी अनलाइन जुवा खेलाउँदै आएका थिए। विशेष सूचनाका आधारमा खटिएको प्रहरी टोलीले गत शनिबार (२०८१ भदौ १८ गते) उनीहरूको घरकोठामा छापा मारेको थियो।
छापाका क्रममा प्रहरीले एक थान कम्प्युटरको सिपियु, एक थान राउटर र दुई थान मोबाइल फोन बरामद गरेको छ। पक्राउ परेका दुवै जनालाई मुलुकी अपराध संहिता २०७४ बमोजिम जुवा खेलाएको कसुरमा अनुसन्धान गरिँदैछ।
जिल्ला प्रहरी कार्यालय मोरङका प्रवक्ता, प्रहरी नायब उपरीक्षक ज्ञानेन्द्र बहादुर बस्नेतका अनुसार पक्राउ परेका व्यक्तिहरूलाई जिल्ला अदालत मोरङबाट म्याद थप गरी थप अनुसन्धान भइरहेको छ।
यस घटनाले अनलाइन जुवाको बढ्दो चलनप्रति सचेत रहन र कानुनी कारबाहीको जोखिमबारे सर्वसाधारणलाई सचेत गराएको छ।
