घुस नदिए विल विजग सहितको सामानलाई पनि नियन्त्रणमा
वीरगन्ज (पर्सा) ।। वीरगन्ज भन्सार कार्यालयमा राजस्व नियन्त्रण गर्न खटिएको सशस्त्र प्रहरीले अहिले घुसखोरीको आतंक नै मच्चाएका छन् । घुस दिए जस्तोसुकै सामान पनि ल्याउन छुट भने घुस नदिए विल विजग सहितको सामानलाई पनि नियन्त्रणमा लिएर भन्सार कार्यालय बुझाउने गरेको देखिएको छ । कुनैपनि सामान ल्याउन पैसा बेरेर हातमा समाईदिए जस्तोसुकै सामान पनि चेकजाँच नगरि भारतबाट नेपाल ल्याउन सकिने अवस्था छ ।
सशस्त्र प्रहरी नायब उपरीक्षक तिलक खड्काको निर्देशनमा खटिएका सशस्त्र प्रहरी टोलीले विहान र बेलुका तस्करहरुसँग पैसा असुल्दै सामान नेपाल ल्याउन दिने क्रमलाई बढाएका छन् । ड्युटी भन्दा पनि कसरी बढि भन्दा बढि पैसा असुल्न सकिन्छ भन्नेतर्फ सशस्त्र प्रहरी अघि बढेको देखिन्छ । साइकलमा गर्ने तस्करी होस् अथवा पोके तस्करी होस् हातमा १ सय रुपैया बेरेर दिए कुनैपनि सामान ल्याउन सकिन्छ । केही बेरसम्म त्यस ठाउँमा गरिएको स्थलगत रिपोर्टिड्ड अनुसार सशस्त्र प्रहरीका जवानहरुले कुना कप्चामा तस्करहरुलाई ल्याए पैसा बुझ्ने गरिएको देखिएको छ ।
सामान सिमा नाकामै राख्ने र पैदल आएर भन्सार कार्यालयका पछाडि अर्थात त्यही कुना कप्चामा सशस्त्र प्रहरीलाई लगेर पैसा दिई सामान ल्याउने क्रम बढ्दो छ । यो त उदाहारण मात्रै हो, दैनिक यस्ता हजारौं तस्करहरु राजस्व नियन्त्रण गर्न खटिएका सशस्त्र प्रहरीलाई घुस दिई राजस्व छल्ने गरेका छन् । यि त साना तिना तस्करहरु हुन् ठूला तस्करसँग भने पैसा असुल्न छुट्टै घुमुवा सशस्त्र प्रहरी परिचालन गरिएको छ ।
वीरगन्जमा रहेको व्यवसायीहरुको सामान वीरगन्ज ल्याउनका लागि ति सशस्त्र प्रहरीका घुमुवाले सेटिड्ड मिलाउने र रातारात ट्रकका ट्रक भन्सार छलिको सामान वीरगन्ज भित्रिने गरेको छ । दिनहुँ भारतबाट करोडौं, अर्बौको माल सामान नेपाल भित्रिने गरेको छ, त्यो सामानहरुमध्ये २५ प्रतिशत सामानको मात्रै भन्सार बुझाउने गरिएको छ भने ७५ प्रतिशत सामान भन्सार छलि गरि अवैध तरिकाबाट सशस्त्र प्रहरीको सहयोगमा नेपाल भित्र्याउने कार्य गरिएको छ । राजस्व नियन्त्रण गर्न भनेर खटाइएको सशस्त्र प्रहरीको सहयोगले नै दैनिक लाखौ करोडौंको राजस्व छलि भइरहेको छ ।
वीरगन्ज भन्सारको मुख्य सडक भन्दा पनि पूर्व र पश्चिमतर्फ रहेको बाटो हुँदै विहान र बेलुका तस्करहरुको लाम नै लाग्ने गरेको छ । पोके तस्कर तथा साइकलमा सामान ल्याउने तस्करहरुले विहान र बेलुका त्यहाँ खटिएका सशस्त्र प्रहरीलाई पैसा बुझाउँदै आफ्नो सामान सुरक्षितका साथ नेपाल ल्याउने गरेका छन् । जसले पैसा दियो त्यसले के सामान ल्याई रहेको छ भनेर चेकजाँच पनि हुँदैन, जसले दिएन त्यो सानोतिनो पनि कुनै सामान ल्याई रहेको छ भने चेकजाँच गरिन्छ अर्थात नियन्त्रणमा लिएर भन्सार बुझाइन्छ भन्ने उदाहारण पनि देखिएको छ ।
सशस्त्र प्रहरीलाई घुस नदिएपछि आफ्नो प्रयोगका लागि ल्याइँदै गरेको पुरानो ल्यापटप नियन्त्रणमा लिई वीरगन्ज भन्सार कार्यालयमा बुझाएको छ । भारतको रक्सौलबाट वीरगन्जतर्फ ल्याउँदै गरेको प्रयोग गरिएको पुरानो बिल बिजग सहितको ल्यापटप सशस्त्र प्रहरीलाई घुस नदिएपछि उनीहरुले नियन्त्रणमा लिएर नयाँ ल्यापटप भनेर भन्सार कार्यालयमा बुझाए । यसले के प्रष्ट हुन्छ कि घुस दिए जेपनि ल्याउन छुट छ, घुस नदिए प्रयोग गरिएको सामानलाई पनि नयाँ सामान भनेर नियन्त्रणमा लिन सकिन्छ भन्ने घृणित मानसिक्ता बसि सकेको छ सशस्त्र प्रहरीहरुमा ।
त्यसमा पनि पुरानो ल्यापटप नियन्त्रणमा लिएपछि सशस्त्र प्रहरीका डि.एस.पी. खड्काले ठूलै तस्करलाई समातेको जस्तो हाउभाउ देखाई रहेका छन् । सानालाई ऐन र ठूलालाई चैन भने जस्तै लाखौं, करोडौंको राजस्व छल्नेसँग सेटिड्ड मिलाउने र दुई चार रुपैया सस्तोको लोभले रक्सौलबाट सामान ल्याउँदा उनीहरुको सामान नियन्त्रणमा लिई राजस्व छलि कार्यलाई रोक्नुपर्छ भन्ने आदर्शवादी बोली बोल्नुले पनि प्रहरी नायब उपरीक्षक खड्काको कार्यशैलीमाथि प्रश्न उठेको छ ।
