कुलदिप दास (प्रेम) जनकपुरधाम ।। जिल्ला स्वास्थ्य कार्यालयले जनकपुरका ११ औषधी पसलमा सिलबन्दी गरिएको छ । अनुगमनको क्रममा मापदण्ड विपरित संचालित औषधी पसलहरु टोलीले बुधवार सिलबन्दी गरेको हो । जनकपुर अंचल अस्पताल वरिपरि अनुगमन गर्दा कानून लत्याएर संचालनमा रहेका ११ औषधी पसल सिलबन्दी गरिएको स्वास्थ्य कार्यालयका खोप अधिकृत दिपेन्द्र रामले जानकारी दिए ।
उनका अनुसार आरुषी मेडीकल हाँल, आमना क्लिनिक, आभाष मेडीकल हाँल, महेन्द्र मेडिकल हाँल, निलु फार्मेसी, मिरा औषधि केन्द्र, राम मेडीकल हाँल लगायतका औषधी पसल सिलबन्दी गरिएको छ । खोप अधिकृत रामले तत्काल २० दिनका लागि औषधी पसलहरु सिलबन्दी गरिएको बताए । उनले २० दिनभित्र प्रक्रिया पुर्याउन निर्देशन दिएको र पालना नगरी संचालनमा ल्याए कानून बमोजिम कारबाही गर्ने बताए ।
कतिपय औषधी पसल अनुमती लिएपनि बिल नदिने गरेको र बिलमा ब्याच नम्बर तथा अन्तिम मिति उल्लेख नगर्ने गरेको पाइएकोले पनि पसल सिलबन्दी गरिएको उनले भने । औषधी पसल संचालनको मापदण्ड पुरा गर्न पटक पटक यसअघि नै स्वास्थ्य कार्यालयले आग्रह गरेका थिए । तर औषधी पसलका संचालकहरु अटेरी गरेपछि अनुगमन गरी कारबाही सुरु गरिएको छ । अनुगमन गर्न पुग्दा दर्जन बढी औषधी पसल बन्द गरेर संचालकहरु फरार भएका थिए ।
