कुलदिप दास (प्रेम) धनुषा ।।
आरक्षण जोगाउ आन्दोलन सशस्त्र बनाउन धनुषामा पनि समिति गठन हुने भएको छ । समाजवादी पार्टीका नेता नविन यादबले आरक्षण जोगाउ आन्दोलनका लागि समिति गठन गर्ने तयारीमा लागेको बताए । लोक सेवा आयोगले आरक्षण कटौती गरेर स्थानीय तहका लागि झण्डै ९ हजार कर्मचारीको विज्ञापन निकाल्दा आरक्षण बचाउ नाममा देशभर आन्दोलन जारी छ ।
जिल्ला जिल्लामा समिति गठन धमाधम भइरहेको छ । धनुषामा हालसम्म समिति नबनेपनि पटक पटक आन्दोलन यूवाहरुले गरेका छन् । आन्दोलनलाई उजाइमा पुर्याउन समिति गठन गरी आवश्यक निर्णय गर्ने नेता यादबले जानकारी दिए । उनले भने, ‘लोक सेवा आयोगले असमावेशी विज्ञापन निकालेर ठूलो विभेद गरेको छ । यसविरुद्ध हामी चरणवद्ध आन्दोलन थाल्छौं ।’
उनले लोक सेवा आयोगले आरक्षण कटौती गरी संविधानलाई नै चुनौती दिएको र संघीयतालाई समाप्त पार्न खोजेको आरोप पनि लगाए । केहि दिनअगाडी जनकपुरमा आयोग अध्यक्ष र सामान्य प्रशासन मन्त्रीको पुतला जलाउँदा नेता यादबसहित दर्जनौं यूवा पक्राउ परेका थिए । नेता यादबले जनकपुरका सरकारी कार्यालयमा व्यापार भ्रष्टाचार र अस्पतालमा ठगी भइरहेको भन्दै सो विरुद्ध पनि आन्दोलन गर्ने जनाएका छन् ।
उनले दुई सातामै चार अस्पतालको लापरबाही बाहिर आएको भन्दै आवश्यक कारबाहीका लागि सम्बन्धित निकायलाई ध्यानाकर्षण गराउन आन्दोलन गर्ने बताए ।
