गणेश कुमार शर्मा
सिरहा,असोज २६ गते । ५ बर्ष सम्म बैदेशिक रोजगार गरी फर्किएका सिरहाका एक युवकले हाँस पालन व्यवसाय सुरु गरेका छन । हाँस पालनबाट सिरहा जिल्ला मिर्चैया नगरपालिका वडा नं. ६ का युवा भोगिन्द्र साहले सम्पूर्ण खर्च कटाएर मासिक १ लाख आम्दानी गर्ने गरेका छन् ।
आफ्नै जमिनमा गत असार बाट व्यावसायिक हाँस पालन सुरु गरेका साह मासिक १ लाख देखि २ लाख कमाए पनि हाँसको दाना तथा कामदारको ज्याला कटाएर पनि कुनै महिना ५० हजार हुन्छ भने कुनै महिना १ लाख आम्दानी हुने बताउँछन् । उनको फाराममा पहिला १ हजार ५ सय हाँस थिए । साहको फाराममा अहिले २ हजार हाँस छन् । उनी दैनिक सरदरमा आफ्नो फारामबाट दैनिक सरदरमा १ देखि २ सय अन्डा उत्पादन हुने बताउँछन् । सो अन्डा २० रुपैयाँको दरले होलसेलमा बिक्री हुने गरेको छ ।
जिल्लालाई अण्डामा आत्मनिर्भर बनाउने लक्ष्यका साथ काम गरिरहेको बताउने भोगिन्द्र साहले मासिक रूपमा ५० हजार देखि एक लाख सम्म आम्दानी गरिरहेको बताए । अन्डा बेच्न कुनै समस्या नभएको र कहिलेकाहीँ माग पूरा गर्न पनि कठिन पर्ने उनको भनाइ छ । व्यावसायिक रूपमा हाँसपालन गर्न सुरुमा भेटेरिनरीको समस्या रहेको थियो तर बिधुतको समस्या रहेको छ ।
