बीरगंज, फाल्गुन ०९।। वीरगञ्जमा बुधबार आयोजित जिल्ला स्तरीय पार्टी कार्यकर्ता भेलालाई सम्बोधन गर्दै सभापति देउवाले शेखर कोइरालाले जथाभावी बोल्दै हिँडेको आरोप लगाएका हुन् । नेपाली कांग्रेसका सभापति शेरबहादुर देउवाले कोइराला परिवारप्रति अक्रोश पोखेका छन् । पार्टीको सभापति कोइराला परिवारकै हुनुपर्ने गलत मानसिकता बोकेर शेखर कोइरालाले जथाभावी बोल्दै हिँडेको आरोप सभापति देउवाले लगाएका छन् ।
कांग्रेस जनताको पार्टी भएको भन्दै देउवाले कोइराला बाहेकको व्यक्ति सभापति भएपछि कोइराला परिवार बौलाएको टिप्पणी गरेका छन् । उनले पार्टीमा शेखर कोइरालाको कुनै योदान नरहेको भन्दै कटाक्ष समेत गरे । ‘उनी कहिले जेल गए, के योगदान छ पार्टीमा’ देउवाले भने, कोइराला भन्ने बित्तिकै हुन्छ ?’
उनले आफ्नो ओठको खत देखाउँदै भने, ‘मण्डलेले त्यसबेला झण्डै मारेका थिए । हाम्रो टाउको फुट्दा, जेल जाँदा शेखर कोइराला कहाँ थिए ?’ आफूहरु जेल बस्दा र टाउको फुटाउँदा शेखर कोइराला भाइस चान्लर बनेर सुविधा दोहन गरेको आरोप देउवाले लगाए । कोइराला परिवारका अहिलेका व्यक्तिहरु २०४६ सालको परिवर्तनपछि राजनीतिमा देखा परेर सुविधामात्र उपयोग गरेको आरोप देउवाले लगाए ।
