अर्घाखाँचीको सन्धिखर्क नगरपालिका वाङलामा बाँसको डस्टविन निर्माणले गर्दा प्रयोग बढ्दैै गएको छ ।
अष्ट्रेलियन रेडक्रसको आर्थिक सहयोगमा नेपाल रेडक्रस सोसाइटीले सञ्चालन गरेको सामुदायिक स्वास्थ्य तथा प्राथमिक उपचार कार्यक्रममार्फत् तालिम लिई बाँसको डस्टविन घर घरले बनाउने र प्रयोग गर्ने गरेका छन् ।
अर्घाखाँची जिल्लाको सन्धिखर्क नगरपालिकाको वडा नम्बर ५ वाङलामा २०१७ को जुलाईदेखि २०२० जुनसम्म अष्ट्रेलियन रेडक्रसको आर्थिक सहयोगमा सामुदायिक स्वास्थ्य तथा प्राथमिक उपचार कार्यक्रम सञ्चालन भइरहेको छ ।
कार्यक्रमले स्थानीय स्रोत र साधनको प्रयोग गरी फोहोर व्यवस्थापनमा समुदायलाई अग्रसर बनाएको छ । जसअन्तर्गत स्थानीय स्तरमा पाइने बाँसबाट डस्टविन बनाउने सीप सिकाइएको छ । वडा नं. ५ का झण्डै पाँच सय घरधुरीमा तालिम दिएको छ । ती घरधुरीलाई दुई वटा समूहमा विभाजन गरी समूहगत आम्दानीको लागि कार्यक्रमले समुदायलाई अग्रसर गराएको छ । वडा नम्बर ५ का वडा अध्यक्ष राजेन्द्र भुषालले रेडक्रसको कामको प्रशंसा गर्नु भएको छ ।
अहिले वडा कार्यालय, नगरपालिका, प्रहरी कार्यालय र पार्कहरूमा समेत बाँसको डस्टविनको प्रयोग गरिएको छ ।
