पहाडी जिल्लाहरुमा सडक दुर्घटनाको अवस्था भयावह बन्दै गएको छ ।जसमध्ये अर्घाखाँचीमा मात्रै पछिल्ला केही वर्षको अवधिमा सयभन्दा बढी जनाले ज्यान गुमाइसकेका छन् ।प्रहरीको तथ्यांकअनुसार प्रदेश ५ को पहाडी जिल्ला अर्घाखाँचीमा सडक दुर्घटनाको अवस्था चिन्ताजनक देखिएको छ ।
जसमा विगत ८ वर्षको अवधिमा भएका १ सय ४२ सवारी दुर्घटनामा १ सय ५० जनाको मुत्यु भएको छ ।
त्यस्तै दुर्घटनामा २ सय ६३ गम्भीर र ३ सय ५ जना सामान्य घाइते भएको तथ्यांकमा उल्लेख छ ।
पछिल्लो समय गत मंसिर ११ गते नरपानीमा भएको दुर्घटनाको पीडा अझै मत्थर हुन सकेको छैन ।
जसमा १९ जनाको मृत्यु भएको थियो भने १८ जना घाइते भएका थिए । सडक दुर्घटनालाई सामान्य ठान्ने प्रवृत्ति रहे पनि यसमा भने छानबिन समिति गठन गरिएको थियो ।
समितिले चालकको लापरबाहीका कारण दुर्घटना भएको निष्कर्ष निकालेको सहायक प्रमुख जिल्ला अधिकारी विक्रम थापा बताउँछन् ।
सन्धिखर्क– गोरुसिंगे सडकखण्डअन्तर्गत नरपानीको करिब १२ किमी क्षेत्रमा वर्सेनी ठूलाठूला दुर्घटना हुने गरेका छन् ।
सो क्षेत्रमा छोटाछोटा घुम्ती भएको साथै चालकको लापरबाहीका कारण पनि दुर्घटना हुने गरेको स्थानीय दिनेश सुनारको भनाइ छ । नरपानी क्षेत्रमा शिवपुर सडक डिभिजन कार्यालयले घुम्ती काट्न सुरु गरेको छ ।
एउटै क्षेत्रमा पटकपटक दुर्घटना हुने गरेको भए पनि सडक सुधार नगरी चालककै लापरबाहीलाई मात्रै दुर्घटनाको कारण देखाइएको छ ।
