करन कुमार मिश्र , रौतहट ।
फतुवा विजयपुर नगरपालिकाको तेश्रो नगरसभा आज भव्यताका साथ सम्पन्न भएको छ । नगरपालिकाको कार्यालय फतुवा विजयपुरको सभाहलमा आयोजित एक कार्यक्रमका बीच नगरपालिकाले आफना तेश्रो नगरसभा सम्पन्न गरेको हो । मेयर र उपमेयरविच लामो समयदेखी चलिरहेको बाद विवादपछि आज रौतहटको फतुवा विजयपुर नगरपालिकाको तेश्रो नगर सभा आज मात्रै सम्पन्न भएको छ । असाढ महिनामै हुनुपर्ने नगरसभा ९ महिना ढिलो गरी विहिवार मात्रै सम्पन्न भएको छ । मेयर गोपालयादव र उपमेयर कान्ती देवी महतोवीच बजेटमा भागबण्डा नमिल्दा यस अघि दुई पटक नगरसभा भएपनि कार्यान्वयन नभई रद्द भएको थियो ।
उपमेयर कान्ती देवी महतोले मेयर यादव आफुखुसी नगरसभा गरेको आरोप लगाउँदै मेयर यादव एकलौटि गरेको नगरसभा रद्द गर्न उच्च अदालतमा निवेदन दर्ता गराएकी थिईन । उपमेयर महतोको जाहेरीको आधारमा उच्च अदालतले यसअघि ११ गतेका लागि निर्धारण गरिएको नगरसभा रद्द गर्न निर्देशन दिएको थियो । मेयर र उपमेयरवीच बजेट बाडफाडको विषयमा नै कुरा नमिल्दानगरसभा पटक पटक स्थगीतहुँदै आएको थियो तर बजेट भागबण्डामा मेयर र उपमेयरको कुरा मिलेपछि बल्लमात्रै असाढ महिनामै हुनुपर्ने नगरसभा आज सम्पन्न भएको छ ।
कार्यक्रममा नगरपालिकाका प्रमुख प्रशासकिय अधिकृत सुरेन्द्र प्रधानले चालु आर्थिक वर्षको लागि निती, कार्यक्रम तथा बजेट सार्वजनिक गर्नुभएको छ । चालु आर्थिक वर्षको निती तथा कार्यक्रम कार्यान्वय नगर्नको लागि नगरपालिकाका प्रमुख प्रशासकिय अधिकृत प्रधानले ५० करोड ४१ लाख ७० हजार ३ सय २३ रुपैया १० पैसा बजेट प्रस्तुत गर्नुभएको छ । नगरपालिकाले आफना निती तथा कार्यक्रममा शिक्षा, स्वास्थ्य, खानेपानी तथा सरसफाई, पूर्वाधार विकास, सडक निर्माण, यातायात, विधुत, सञ्चार, खेलकुद, कृषि लगाएतका विकास निर्माणको कामले विशेष प्राथमिकता दिएको छ ।
यसैविच नगरपालिकाको नगरसभा विहिवार दुई तिहाई बहुमतले सम्पन्न भएपछि नगरका कर्मचारी र शिक्षकहरुको तलव निकासा हुने बाटो खुलेको छ । नगर सभा नभएकै कारण नगरपालिकाका सयौ शिक्षक तथा कर्मचारीहरु गत असाढ देखी नै अहिले सम्म तलवभत्ता खान पाएका छैनन । तर विहिवार नगरसभा सम्पन्न भएपछि अब शिक्षक तथा कर्मचारीहरुको तलव चाडै निकासा हुने मेयर गोपाल यादवले बताउनुभयो ।
