अखिलेश कुमार यादव, रौतहट जेठ १४ ।। रौतहट जिल्लाको राजपुर नगरपालिकाको वडा नं. २ भगवानपुरमा मङ्गलवार बिहान एक व्यक्तिको बेवारिसे अवस्थामा शव फेला परेको छ ।
अन्दाजी ४०–४५ वर्षको व्यक्तिको शव फेला परेको प्रहरीले जनाएको छ । मृतको शव उखुको खेतमा फालिएको थियो । घाँस काट्न गएका एक स्थानीयले शव देखेपछि गाउँलेले प्रहरीलाई जानकारी गराएका थिए ।
घटनाको खबर प्राप्त लगतै जिल्ला प्रहरी कार्यालयको टाली र सशस्त्र प्रहरीको टोली घटनास्थलमा पुगेको थियो । जिल्ला प्रहरी कार्यालय रौतहटको अनुसार शव पहिचान गर्न गाह्रो भएकोले सनाखतको लागि जिल्ला अस्पताल गौर पठाइएको छ । घटनाको थप विवरण आउन बाँकी छ ।
